İkbâl için ahbâbı si'âyet yeni çıktı
Bilmez idik evvel bu dirâyet yeni çıktı
Sirkat olup lafz-ı sadâkat modalandı
Nâmûs tamâm oldu hamiyyet yeni çıktı
Düşmanlara ahbâbını zemm oldu zarâfet
Dil-dârdan ağyâra şikâyet yeni çıktı
Sâdıklara tahkîr ile red kâ'ide oldu
Hırsızlara ikrâm ü inâyet yeni çıktı
Hak söyleyen evvel dahi menfûr idi gerçi
Hâinlere ammâ ki riâyet yeni çıktı
Evrâk ile i’lân olunur cümle nizâmât
Elfâz ile terfîh-î ra’iyyet yeni çıktı
Âciz olanın ketm olunur hakkı-ı sarîhi
Mahmîleri her yerde himâyet yeni çıktı
İsnâd-ı ta’assub olunur merd-i gayûra
Dinsizlere tevcih-i reviyyet yeni çıktı
İslâm imiş Devlet’e pâ-bend-i terakkî
Evvel yoğ idi işbu rivâyet yeni çıktı
Milliyyeti nisyân ederek her işimizde
Efkâr-ı Fireng’e tebaiyyet yeni çıktı
